აშშ-ში, 12 წლის ბავშვი ვერ გადარჩა მას შემდეგ, რაც პოპულარულ ტბა მიურეიში ცურვისას ამებით დაინფიცირდა. ამის შესახებ გამოცემა Mirror-ი იტყობინება.

როგორც გამოცემისთვის გახდა ცნობილი, ინციდენტი სამხრეთ კაროლინაში მოხდა, სადაც 12 წლის ჯეისენ კარს პარაზიტის სახეობა Naegleria fowleri შეეყარა, რომელიც იწვევს პირველად ამებურ მენინგოენცეფალიტს - ტვინის მძიმე ანთებას.

ბიჭუნას ინფექციის სიმპტომები 7 ივლისს გამოუვლინდა. მისმა ოჯახის წევრებმა, რომლებიც ადვოკატ ტაილერ ბეილის მეშვეობით ისაუბრეს, განაცხადეს, რომ ისინი შოკირებულები არიან ტრაგედიით და აპირებენ დაადგინონ ინფექციის გარემოებები, რათა მომავალში თავიდან აიცილონ მსგავსი შემთხვევები.

ისინი ასევე მადლობას უხდიან Prisma Health-ის ბავშვთა საავადმყოფოს ექიმებსა და ექთნებს თავდადებული შრომისთვის და კონფიდენციალურობის დაცვისთვის,

საერთო სტატისტიკის თანახმად, აშშ-ში 1962 წლიდან მოყოლებული ამ სახეობის ამებით ინფიცირების 164 შემთხვევაა რეგისტრირებული და მათგან მხოლოდ ოთხ შემთხვევაში გადარჩა პაციენტი.

ამ ზაფხულს, ტეხასში 71 წლის ქალს Naegleria fowleri-ით გამოწვეული ტვინის ინფექცია განუვითარდა, მას შემდეგ, რაც საკუთარ ავტოფურგონში ონკანის წყლით ცხვირი გამოირეცხა. მისი გადარჩენაც ვერ მოხერხდა.