უჩვეულო Volkswagen Beetle აუქციონზე გაიყიდება აგვისტოში კალიფორნიაში. შავი ფერის უნიკალური ლიმუზინი 150 000 – 200 000 დოლარადაა შეფასებული - თანხა, რომელიც ნებისმიერი „ხოჭოსთვის“ პრაქტიკულად მიუღწეველი მაჩვენებელია.

ავტომობილი 1969 წელს შეიქმნა სარეკლამო მიზნებისთვის Volkswagen-ის ამერიკული ფილიალის დაკვეთით. პროექტი განახორციელა კალიფორნიულმა სახელოსნომ Troutman-Barnes, რომელიც ცნობილია სარბოლო მოდელებით Chaparral და Scarab, ასევე სპეციალურად გადაკეთებული Porsche-ებით.

საფუძვლად გამოყენებული სტანდარტული ორკარიანი „ხოჭო“ შუაზე გაჭრეს და ერთი მეტრის სიგრძის დამატებითი ჩასანერგი კონსტრუქციის მეშვეობით გააგრძელეს. დაამატეს დამატებითი წყვილი კარი ელექტროწამოწევადი მინებით. უკანა სავარძლებზე მჯდომებს უკვე თავისუფლად შეეძლოთ ფეხების გაჭიმვა; ინტერიერში დამონტაჟდა ასაკეცი სკამები, მინი ბარი გასაშლელი მაგიდით, გამყოფი კედელი და ინტერკომი კომფორტისა და კონფიდენციალურობისთვის.

სალონი წითელი ხით მოაპირკეთეს, გაუმჯობესდა ხმის იზოლაცია, ხოლო აღჭურვილობა გაფართოვდა: დამონტაჟდა Philips-ის აუდიო სისტემა ხუთი დინამიკით და კასეტების დამკვრელით, რომელიც მოგვიანებით Kenwood-ის CD-ჩეინჯერმა ჩაანაცვლა.

გასაკვირია, რომ „გრძელმა ხოჭომ“ შეინარჩუნა დონორის მექანიკური გადაცემათა კოლოფი. რაც შეეხება ძრავას, საწყისი 1.5-ლიტრიანი ოთხცილინდრიანი ძრავის ნაცვლად გამოიყენეს უფრო ძლიერი, 1.6-ლიტრიანი Volkswagen-ის ძრავა Weber-ის კარბურატორებით, რაც აუცილებელი იყო ავტომობილის 181 კილოგრამით გაზრდილი წონის დასაბალანსებლად.

Porsche-Volkswagen-ის დასავლეთ სანაპიროს დილერის, ჯონ ფონ ნეიმანის მონაცემებით, ავტომობილის გადაკეთება გერმანელებს 34 500 დოლარი დაუჯდათ. ეს იმ დროისთვის 17 სტანდარტული „ხოჭოს“ ფასს შეადგენდა, რადგან თითოეული მაშინ დაახლოებით 2 ათას დოლარად იყიდებოდა.

მეტსახელად Rollswagen, გრძელი „ხოჭო“ მოგვიანებით მუშაობდა ბევრ საზეიმო ღონისძიებაზე და, როგორც ამბობენ, 1970 წელს მსოფლიო კინოს ლეგენდა ჯონ უეინი ოსკარის დაჯილდოების ცერემონიალზე მიიყვანა.

ასევე დაგაინტერესებთ:

10 საიმედო ავტომობილი, რომელიც მინიმალური მოვლით 20 წელი გაძლებს

სილამაზე და ფუფუნება: 7 ყველაზე ძვირადღირებული ავტომობილი 2025 წელს

როგორ გამოიყურებოდა ლუი მატარის კადილაკი, 1947 წლის ავტომობილი, რომელსაც ჰქონდა ყველაფერი

10 უკიდურესად იშვიათი მანქანა, რომელსაც გზაზე ვერ შეხვდებით

„პატარა ნაძირალა“ – ჯეიმზ დინის სიკვდილის მომტანი მანქანა