სპეციალისტების თქმით, პრობლემის აღმოსაფხვრელად აუცილებელია, დაადგინოთ მოზარდის ცუდი ქცევის გამომწვევი მიზეზები.

აგრესია არის ერთგვარი სიგნალი, რომ ბავშვის ცხოვრებაში ყველაფერი კარგად არ არის. აგრესიის გამოვლენის ერთ-ერთი ძირითადი მიზეზი მშობლის არასაკმარისი ყურადღებაც შეიძლება აღმოჩნდეს. მნიშვნელოვანია სოციალური ფაქტორი – ოჯახი, ბაღი, სკოლა, მეგობრები, წიგნები და ა.შ.

პირველ რიგში მნიშვნელოვანია მშობელმა საკუთარი შვილი პოზიტიური მეთოდების გამოყენებით აღზარდოს.

1.დაადგინეთ მაპროვოცირებელი ფაქტორი – სიტუაცია, რომელიც უბიძგებს ბავშვს აგრესიული ქმედებისკენ- თუ შვილი გულს გადაგიშლით და თავისი აგრესიის მიზეზს გეტყვით, მოუსმინეთ. გაიგეთ, რის გამოა აგრესიული, რატომ გეუზრდელებათ. აჩვენეთ, რომ მზად ხართ, დაეხმაროთ.

2. არ განსაჯოთ - არავითარ შემთხვევაში არ დაიწყოთ მისი განსჯა. მხოლოდ და მხოლოდ გაგებით მოკიდება მოგცემთ საჭირო შედეგს.

3.თავი აგრძნობინეთ მნიშვნელოვან ადამიანად - კარგი იქნება, თუ მოზარდ შვილს ზოგჯერ თქვენც ჰკითხავთ რჩევას. ის მეტ პასუხისმგებლობას იგრძნობს, მიხვდება, რომ მისი აზრი მნიშვნელოვანია და ოჯახის სრულუფლებიანი წევრია.

4.მოარიდეთ ძალადობის ამსახველ კადრებს- ეცადეთ, მოარიდოთ ბავშვი ისეთ გადაცემებს, მულტფილმებს, ზღაპრებს, რომლებშიც ძალადობა გამართლებულია.

5.მართეთ საკუთარი თავი - მოზარდთან საუბრისას აკონტროლეთ საკუთარი მეტყველება და ემოციები. მოერიდეთ ბრძანებების, მუქარისა და ბრალდებების გამოყენებას. ყურადღებას მხოლოდ უარყოფით მხარეებზე ნუ გაამახვილებთ, აუცილებლად შეაქეთ და მოიწონეთ მისი კარგი საქციელი.