როგორც მოგეხსენებათ, გუშინ საქართველოში ერთიანი ეროვნული გამოცდების ციებ-ცხელება დაიწყო. ეს დღეები ერთნაირად აღელვებთ როგორც აბიტურიენტებს, ასევე მათ მშობლებსა და გულშემატკივრებს.

გამოცდების ეროვნული ცენტრის ხელმძღვანელი მაია მიმინოშვილი იმ მიზეზების შესახებ საუბრობს, რის გამოც გამოცდების პირველ დღეს აბიტურიენტები საგამოცდო პროცესიდან მოიხსნენ.

ორ ივლისს ქართულ ენასა და ლიტერატურაში ერთიანი ეროვნული გამოცდების პირველი სესია დასრულდა. მიმინოშვილის თქმით, გამოცდებმა მშვიდ ვითარებაში ჩაიარა. გამოცდიდან სხვადასხვა მიზეზის გამო სულ ხუთი აბიტურიენტი მოიხსნა: დაგვიანება, არაფხიზელ მდგომარეობაში გამოცხადება და ფოტოაპარატიანი საათი, რომლითაც აბიტურიენტმა ბუკლეტს და საგამოცდო პასუხს სურათი გადაუღო. ეს დააფიქსირა მეთვალყურემ. აბიტურიენტმა კი აღიარა, რომ ეს ჩაიდინა. მის მიმართ შესაბამისი ოქმი გაფორმდა და წესების მიხედვით, რაც საგამოცდო სივრცეში ნებისმიერი ელექტრონული მოწყობილობის შეტანის აკრძალვას ითვალისწინებს, აბიტურიენტი გამოცდიდან მოიხსნა.
“შარშანდელს თუ შევადარებთ, მთელი პროცესის განმავლობაში, ასეთი შემთხვევა არ ყოფილა. ძალიან მინდა, აბიტურიენტები გავაფრთხილო - ნუ გარისკავენ და ნუ გააკეთებენ ასეთ რაღაცას, რადგან მსგავსი ქმედება შესაბამისი ფორმით ისჯება“, - განაცხადა მიმინოშვილმა.