XXI საუკუნეში მომხმარებლური ტენდენციებია გაბატონებული.
თანამედროვე საზოგადოება პრაგმატულობით ხასიათდება. ადამიანები ყველაფერს შეძენის პრინციპით განვსაზღვრავთ.
ხშირად ნივთები ჩვენი ცხოვრების მიზნად იქცევიან. ხანდახან
იმდენად გვიტაცებს შეძენის პროცესი, რომ ვყიდულობთ საგნებს,
რომლებიც არც კი გვჭირდება... სამწუხარო რეალობაა, რომ
მატერიალური კეთილდღეობა არა მარტო მოთხოვნილებების
დაკმაყოფილების საშუალება, არამედ სოციალური პრესტიჟის და სტატუსის შექმნის წყაროს წარმოადგენს. ეს საზოგადოების უმნიშვნელოვანეს და თანამედროვეობის მეტად
„ადამიანის გაუცხოებას“ უკავშირდება. თუმცა, ჩვენს სტატიაში
მას განვიხილავთ, არა როგორც სოციუმის მანკიერებას, არამედ ერთგვარ სოციალურ ცოდნას, რომელსაც აქტიურად იყენებენ მარკეტ-
ინგში. სანამ უშუალოდ საკითხს ჩავუღრმავდებოდით, მოდით განვიხილოთ მარკეტინგის ცნება. ტერმინი „მარკეტინგი“ XIX-XX საუკუნეების მიჯნაზე გაჩნდა. ის ერთი მხრივ გულისხმობს ბაზრის
ყოველმხრივ და საგულდაგულო შესწავლას, მომხმარებელთა
მოთხოვნილებებისა და გემოვნების ცოდნას, ხოლო მეორე მხრივ მარკეტინგი აქტიური ზემოქმედებაა ბაზარზე და არსებულ მოთხოვნილებებზე, ასევე მათი ფორმირების წესებზე.
ალბათ, გაგვიჭირდება, გავიხსენოთ თუ როგორი ძლიერი სურვილი გვიპყრობს, როდესაც ამა თუ იმ მოდური და პოპულარული
პროდუქტის ყიდვა გვსურს, ან ე.წ „დეფიციტური“ ნივთის ხელში ჩაგდებით ვართ მოხიბლულები. ეს ემოციები სავსებით
ბუნებრივია ადამიანებისთვის თუმცა, მარკეტინგის სფეროში მომუშავეთათვის ის ჩვენს სისუსტედ აღიქმება, რომელიც
რომელიმე ბრენდის პიარის დროს ჩვენსავე საწინააღმდეგოდ გონივრულად გამოიყენება. როგორ ფიქრობთ,
განა ყოველთვის „ფანტასტიურად გამოვიყურებით“ და „ჩვენს ტანზეა შეკერილი “ ტანსაცმელი, რომელსაც მაღაზიის კონსულტანტი გვთავაზობს, ან იქნებ არც „უნიკალურად გასაღებული“ ნივთია ერთადერთი და განუმეორებელი ექსპონატი... თუმცა,
თქვენ წარმოიდგინეთ, ყოველივე ეს მარტივი და უსუსური
„ოინებია“ მთელ რიგ დახვეწილ მეთოდებთან შედარებით, რომელთათვისაც წინააღმდეგობის გაწევა, მართლაც,
ურთულესია. ერთ-ერთი მათგანია ფერთა ფსიქოლოგიის
გამოყენება პიარტექნოლოგიებში.სავარაუდოდ, ვერ გაგაკვირვებთ თუ გეტყვით, რომ ფერებს ემოციებზე უდიდესი გავლენა აქვს.
თითოეული მათგანი ცნობიერებაში გარკვეულ ასოციაციას
ქმნის. ფერების სწორად შერჩევას გადამწყვეტი მნიშვნელობა აქვს კომპანიათა ბრენდირების პროცესში.
კვლევები ცხადყოფს, რომ ფერი პროდუქტის შერჩევისას მომხმარებლის გადაწყვეტილებაზე ზემოქმედებს, რაც
მიგვანიშნებს, რომ მას შეუძლია ხელი შეუშალოს ან შეუწყოს პროდუქტის გაყიდვას.ის პირველი კომპონენტია, რომელიც
ლოგოზე მომხარებლის მიერ აღიქმება. მარტივ ექსპერიმენტს
გთავაზობთ : გავიხსენოთ ცნობილი ბრენდები და მათი საფირმო ნიშნები . მაგალითად, ყველაზე პოპულარული სოციალური ქსელის
facebookის სახელის წარმოთქმისას ჩვენს ცნობიერებაში ლურჯი
ფერი ჩნდება, რომელიც სიმშვიდის, პროფესიონალიზმის,
წარმატებისა და სერიოზულობის სიგნალის მატარებელია. ახლა
coca-colaსთან დაკავშირებულ წითელზე ვისაუბროთ, რომელიც
ემოციურად ყველაზე ინტენსიური ფერია, ის სიცოცხლეს, ენერგიას, მოძრაობას, სიყვარულსა და მღელვარებას უკავშირდება.
მგონი ნათელია, რატომაა კვების ობიექტები ხშირად წითელსა და ნარინჯისფერში გადაწყვეტილი. ეს უკანასკნელი ხომ სითბოს,
კომფორტს, და ახალგაზრდობას მოგვაგონებს.
ახლა კი, იმ მეთოდებზე დავფიქრდეთ, რომელთა საშუალებითაც სურთ დაგვითანხმონ რეკლამის დამკვეთები უამრავ ფულს იმიტომ არ ხარჯავენ, რომ საკუთარი ნაწარმის კარგად წარმოჩენა სურთ. მათი სიგნალები ხშირად გვაიძულებენ განვახორციელოთ
მათი სასურველი ქცევები... ერთ-ერთი ძირითადი წესი, რომელიც ჩვენს ცხოვრებაში დომინირებს „მიგების ნორმის“სახელითაა ცნობილი, ის გულისხმობს ადამიანის მოლოდინს, რომ
გაწეული სამსახური დაუბრუნდება. მას აქტიურად იყენებენ გამყიდველები, როცა თითქოს გულისხმიერებას იჩენენ ჩვენს მიმართ
და წინასწარ გვთავაზობენ პროდუქტსს ფასთან შედარებით
ასეთ სიტუაციაში ბუნებრივია, რომ მყიდველმა საპასუხო

თავაზიანობა გამოიჩინოს და შეიძინოს ის. ადამიანის მხრიდან სულ მცირე სიკეთეც კი მეორე მხრიდან საპასუხო შედეგებს იწვევს. დათანხმების გზას წარმოადგენს ე.წ „კარის ცხვირწინ მიჯახუნების’ მეთოდი .ის გამოიხატება ადამიანის მიდრეკილებაში დიდ თხოვნაზე უარის თქმის შემდეგ, ადვილად დათანხმდეს შედარებით ზომიერი
თხოვნის შესრულებაზე.არანაკლებ საინტერესოა, "კარში ფეხის
ჩადგომის“ მეთოდი, რომელიც ვალდებულების პრინციპს ეფუძნება
და გულისხმობს მცირე თხოვნიდან დიდ თხოვნაზე გადასვლის მცდელობას. ეფექტურად მოქმედებს ე.წ "დეფიციტური" საქონლით
მანიპულირება.ადამიანის სურვილს ფლობდეს უნიკალურ
ნივთს მოხერხებულად იყენებენ, როდესაც გვეუბნებიან: „ახლავე გირჩევთ ყიდვას ერთიღა დაგვრჩა“. მოდით განვიხილოთ „მოდელირების მეთოდიც“, რომელიც ადამიანებისგან კონფორმულობის გამოვლენას ეფუძნება, მათზე თვალსაჩინო ნიმუშის დემონსტრირებისას. შესაძლებელია, თქვენ უკვე გიფიქრიათ ადამიანთა სწრაფვაზე მიეკუთვნებოდნენ ამა თუ
იმ ჯგუფს, მაგრამ საინტერესოა აცნობიერებთ თუ არა იმას, რომ მართლაც, სასაცილოდ გამოვიყურებით, როდესაც ამ მისწრაფებას ჩვენსავე გასაბითურებლად იყენებენ მარკეტინგის სფეროში, რათა გაგვაკეთებინონ ის, რის გაკეთებასაც არ ვისურვებდით... მაგალითისვის, ვფიქრობ, ურიგო არ იქნება გავიხსენოთ
გამყიდველთა დაჟინებული მცდელობა გაგვაერთიანონ
ჩვენთვის სასურველ ისეთ კატეგორიებში, როგორიცაა : „გემოვნებიანი მყიდველი“, „ მოდური ახალგაზრდა“, „ ინტელექტუალი კლიენტი“ და ა.შ.
ეს მხოლოდ მცირე ნაწილია იმ ხერხებისა, რომელიც მარკეტინგს „უძლეველ მოწინააღმდეგედ“ აქცევს. იმედი მაქვს სტატია
დაგეხმარათ გაგეანალიზებინათ, რომ ამ სფეროში მცირე დეტალსაც კი მნიშვნელოვანი ფუნქცია აქვს და არაფერია შემთხვევითი. ვფიქრობ, გონიერ მომხმარებლად ჩვენთვის რთული ამოცანა აღარ უნდა იყოს.
მთავარია შევეცადოთ არ ავჩქარდეთ და ყოველთვის დავიტოვოთ დრო საუკეთესო გადაწყვეტილების მისაღებად.