არალეგალური ბინადრობა და თავშესაფრის უსაფუძვლო მოთხოვნები დასავლეთ ბალკანეთის ზოგიერთი სახელმწიფოდან, ასევე მოლდოვადან, საქართველოდან და უკრაინიდან, ევროკავშირში უვიზო მიმოსვლის შეჩერების შესახებ დისკუსიებს იწვევს, - ამის შესახებ EUobserver-ი წერს.
გამოცემის ინფორმაციით, მათთვის ცნობილი გახდა 27 სექტემბრით დათარიღებული ევროკავშირის შიდა ანგარიშის შინაარსი.
EUobserver-ის მტკიცებით, დოკუმენტში გერმანია უკმაყოფილებას გამოხატავს საქართველოს, მოლდოვასა და უკრაინის მიმართ და პრობლემური ქვეყნების ათეულში ასევე დაასახელა ალბანეთსი და სერბეთი.
ანგარიშში აღნიშნულია, რომ ბოლო სამი თვის განმავლობაში საქართველოდან თავშესაფრის მაძიებლების რაოდენობა 2019 წლის ანალოგიურ პერდიოდთან შედარებით 51 პროცენტით არის გაზრდილი.
თუკი მესამე ქვეყნების მხრიდან მდგომარეობა არ გაუმჯობესდება, ევროკომისიამ, ჩვენი აზრით, ხაზი უნდა გაუსვას იმას, რომ ვიზების შეჩერების მექანიზმის გააქტიურება რეალურია, - აცხადებს დოკუმენტში გერმანიის დელეგაცია.
საქართველოსა და ალბანეთის მიმართ უკმაყოფილებას გამოხატავს საფრანგეთი. ჩეხეთის რესპუბლიკა კი აცხადებს, რომ თავშესაფრის უსაფუძვლო მოთხოვნის მაღალი მაჩვენებელი ფიქსირდება საქართველოს, მოლდოვისა და უკრაინის მოქალაქეების მხრიდან.