ადამიანების უმეტესობისთვის ცნობილი ამერიკელი მწერლის ჯეკ ლონდონის სახელი სათავგადასავლო მოთხრობებთან და სოციალურ რომანებთან ასოცირდება, მაგრამ ცოტამ თუ იცის, რომ მწერალს ლიტერატურის გარდა, კიდევ ერთი, სერიოზული გატაცებაც ჰქონდა - ფოტოგრაფია. ძირითადი საქმიანობისგან მორჩენილ თავისუფალ დროს, ის ბევრს იღებდა. მისი ფოტოების გმირები კი, როგორც მაწანწალები, ასევე სტუდენტები, სამხედროები და ჩვეულებრივი, რიგით გამვლელები იყვნენ. ჯეკ ლონდონის კოლექცია სულ 12 ათასზე მეტ ფოტოსურათს შეადგენს, რომელთა უმეტესობაც დიდი ხნის განმავლობაში გამოუქვეყნებელი დარჩა, სანამ რამდენიმე წლის წინ, ავტორის პირველმა ფოტოკრებულმა დღის სინათლე არ იხილა. 2010 წელს საზოგადოებამ ფოტოწიგნში მისი თვალით დანახაული 200 უნიკალური ფოტოკადრი იხილა. ახლა უკვე თამამად შეგვიძლია ჯეკ ლონდონის არა მხოლოდ მწერლობის ნიჭით, არამედ მისი ფოტონამუშევრებითაც აღვფრთოვანდეთ.